居屋疑難解答(答) – Homebloggerhk 收息買樓債券基金財務自由

以筆者所見家庭收入近四萬而借二百八十萬之按揭令你負擔驟增。因330萬樓宇買入後減去50萬首期要借280萬。以你咁講，你買完樓後將會冇CASH係手。而每月供款要拉到30年才可將月供款減低至10000完，25年供會年供款增至$12000，都可上會有餘但令你儲唔到$落袋。換言之到時層樓升跌會主宰你黎緊多年命運，層樓升一成可等於你(3.30mil * 10% / 13000)=要25個月先儲到既錢。跌一成都一樣。係如此升浪唔到頂都到尾之時候，為何以身試市呢? (因為你睇錯市每跌些少你都要賣兩年身)

諗樣相信白表居屋較適合你。黃大仙附近之慈雲山仲有不少二百萬之選擇(未補地價)。私樓風險亦唔係細，勝在可隨時加按但而家買間私樓少都要2.60mil(例:荃灣中心404呎)。居屋推出就係要幫你慳返個地價，用平價解決自身住屋問題。既然你合規申請就唔好浪費，除非你好有把握間樓可以幫你賺到錢，否則唔應該用伺自己大份金錢去買(投資)一項目。

買樓雖然可以係滿足自己居住需求，但要理會當中投資風險。唔可以因自己要住就咩都唔理走去買。買居屋可以唔比地價慳返約三成樓價，但要當作投資品賣出或套現時有一定難度。私樓質素參差及要比地價，但用作套現及賣出可不受限制。在此重申一次兩者之分別。至於實用率一般居屋較好，管理費都係居屋平。要知道而家私樓管理費已升至2000一個月不為奇。慳返留比仔女讀書更適當。

趁機重提一次，你要唔補地價咁買居屋主要有幾個途徑:1. 你係公屋戶主，只要你肯放棄公屋就可以用綠表免補地價買居屋。但留意你父母係公屋戶主唔代表你可以走去申請綠表上居屋。以筆者所記除非你係間細公屋住六個人或更多先有條件用擠迫戶提出拆戶，即分配多一間公屋比你，咁咪兩個都可以一齊申請。要攪擠迫戶或有病調遷，請找社工。

另一方法係一個人或一家人先上公屋，要低收入配合。一個人約$8700月入而一家人不超$16000。按此看房署關於收入之解說。上到公屋每月要比錢交租，之後可比錢再買居屋。第三方法係最近熱討既白表免補地價買居屋或置安心，形式近似都係要一人月入不過$2100，家庭不過$40000，可入表而抽中會叫你去睇樓，睇中比錢。比乃三個最主要途徑「上樓」。

讀者打得成篇文上homebloggerhk問相信係心思熟慮之輩。亦知結左婚一排仲同母親住難免想搬出享受二人世界，但如想提前搬出享受二人世界是有代價的，凡是有因必有果，希望筆者幫到你。